Sco ina dallas pli veglias representaziuns humanas dil Grischun ei la stela da Sietschen da valeta nungetg aulta. Quei ei era la raschun daco ch’igl original resta bein protegius en ina stanza d’exposiziun dil Museum retic. Plievgia, neiv, calira e scheltira fagessen svanir tec a tec il maletg sil crap. Datier dil liug da scuvretga paradescha sin l’iniziativa dall’uniun da cultura Pro Lumerins il cul reproducius a mesira precisa. Mellis puncts da mesiraziun digl original han formau la basa per in model treidimensiunal e la fuorma da gep creada ordlunder. Sco material da culada ei vegniu eligiu tombac, ina legaziun d’irom e zinc. La cularia d’art a Sogn Gagl (Kunstgiesserei St.Gallen) ha realisau il cul cun gronda premura artisanala. El process da cular ed entras las retuschas ha il tombac survegniu sia patina caracteristica. Quella lai cumparer las differentas cozzas dils temps dil monument original – la liunga historia da formaziun dil crap, las strihadas muort erosiun ed ils fastitgs dall’elaboraziun entras mauns humans. Dapli informaziun anfleis vus el document aschuntau.

Fotos Laura Egger